Sot, më 24 tetor 2026, nën moton “Në 40-vjetorin e Kartës së Otavës: Së bashku për shëndet dhe mirëqenie”, u përmbyllën punimet e ditës së dytë dhe finale të kësaj ngjarje madhore shkencore në Hotel Emerald, Prishtinë.
Dita e sotme mblodhi profesionistë shëndetësorë, hulumtues dhe studentë në sesione paralele me interes publik dhe akademik:
Punëtori interaktive: Ngritje e kapaciteteve mbi komunikimin shëndetësor për sjellje më të shëndetshme si dhe aktivitetet e promovimit shëndetësor te punëtorët me orar pune me ndërrime.
Sëmundjet kronike jongjitëse dhe ngjitëse: Hulumtimet e fundit mbi duhanpirjen te të rinjtë në Kosovë (GYTS 2025), kontrollin e kancerit, dhe sfidat e epidemive të fundit të fruthit.
Popullatat e ndjeshme dhe shëndeti mendor: Rëndësia e modelit komunitar për shërbimet e shëndetit mendor dhe kujdesi ndaj të moshuarve.
Gjinia dhe përfshirja e komunitetit: Strategjitë e parandalimit të sëmundjeve malinje te gratë, shëndeti i planetit dhe mbikëqyrja e cilësisë së ujit.
Sesioni i poster prezantimeve: Punime shkencore inovative nga autorë të shumtë që sollën tema me rëndësi në mjekësinë parandaluese.
Kongresi u përmbyll zyrtarisht nga Drejtoresha Ekzekutive e IKSHPK-së, Prof. Asst. Dr. Ardita Baraku, duke lënë pas mesazhe të fuqishme për bashkëpunim institucional dhe fuqizim të komunitetit në frymën e Kartës së Otavës.
Së bashku për shëndet dhe mirëqenie!
#KongresiIMjekësisë #KartaEOtavës #ShëndetiPublik #IKSHPK #Mjekësi #Prishtinë