Më 14 dhe 15 tetor 2026, në Qendrën Operative për Emergjenca të Shëndetit Publik të Institutit Kombëtar të Shëndetësisë Publike të Kosovës (IKSHPK), në Prishtinë, u mbajt trajnimi dyditor për përdorimin e sistemit EIOS (Epidemic Intelligence from Open Sources-Inteligjenca Epidemike nga Burimet e Hapura), me ekspertë nga Organizata Botërore e Shëndetësisë (OBSh) dhe Qendra Evropiane për Parandalimin dhe Kontrollin e Sëmundjeve (ECDC).
Trajnimi u zhvillua në mënyrë interaktive, duke ndërthurur prezantimet, demonstrimet e sistemit, ushtrimet praktike dhe diskutimet profesionale. Pjesëmarrësit u njohën me funksionalitetet e platformës EIOS, navigimin në sistem, shqyrtimin e artikujve dhe informacioneve nga burimet e hapura, si dhe me kategoritë e burimeve dhe mënyrat e shfrytëzimit të tyre për qëllime të inteligjencës epidemiologjike.
Në kuadër të programit u trajtuan gjithashtu përvojat e OBSh-së dhe ECDC-së në fushën e inteligjencës epidemiologjike, u prezantua platforma e Menaxhimi Elektronik të Emergjencave të Shëndetit Publik (ePHEM) dhe u zhvilluan ushtrime praktike për zbatimin e njohurive të fituara.
EIOS është një nismë globale e udhëhequr nga OBSh-ja, që mundëson identifikimin, vlerësimin dhe monitorimin e kërcënimeve ndaj shëndetit publik përmes informacioneve nga burimet publike, në kohë pothuajse reale. Përdorimi i këtij sistemi kontribuon në zbulimin e hershëm të sinjaleve me rëndësi epidemiologjike, mbështet vlerësimin e rreziqeve dhe ndihmon institucionet shëndetësore në forcimin e gatishmërisë dhe reagimit ndaj kërcënimeve dhe emergjencave të shëndetit publik.
#IKSHPK #EIOS #OBSh #ECDC #ShëndetiPublik #InteligjencaEpidemiologjike