Epidemiologë dhe specialistë të shëndetit publik të Institutit Kombëtar të Shëndetësisë Publike të Kosovës, po marrin pjesë në ushtrimin (on-line) global të Rrjetit të Qendrës së Operacioneve Emergjente të Shëndetit Publik EOC-NET (GEOCX 2024), të organizuar nga Organizata Botërore e Shëndetësisë.
Objektivat dhe qëllimi i ushtrimit ishin testimi i aktivizimit të Qendrave Operative Emergjente të Shëndetit Publik, në rastet kur ka kërcënime të shëndetit publik.
Në mënyrë specifike, përmes ushtrimeve konkrete, është testuar efektiviteti i procedurave të reagimit në vend në rast të shfaqjes së emergjencave të shëndetit publik me potencial të përhapjes në shumë vende; zbatimi i kornizës ligjore në fuqi lidhur me emergjencat shëndetësore; planet dhe procedurat e reagimit; aftësia për të ngritur një Sistem të Menaxhmit të Incidentit; testimi i kapaciteteve reaguese; koordinimi i reagimit dhe bashkëpunimit me partnerët lokalë dhe ndërkombëtarë; rëndësinë e informacionit dhe komunikimit; aftësia për të përfshirë komunitetin në menaxhimin e emergjencave dhe përdorimi i teknologjisë së nevojshme. Ushtrimi ka përfshirë përdorimin e procedurave për tre mënyrat e funksionimit të Qendrave Operative Emergjente të Shëndetit Publik: Mbikëqyrjen, Alarmimin dhe Reagimin.
Ushtrimi është koordinuar me ekspertët e OBSH-së nga Qendra Operative e Emergjencave të Shëndetit Publik në Addis Abeba, ku është mbajtur ushtrimi në vend.