Në Laboratorin për monitorimin e parametrave të brendshëm të IKSHPK-së u mbajt trajnimi “Ndotja e ajrit të brendshëm, përdorimi dhe matjet me sensorë”, në funksion të forcimit të kapaciteteve profesionale në matjet e parametrave mjedisorë, plotësimin e pyetësorëve dhe vendosjen e sensorëve dhe aparaturave në mjediset e brendshme.
Ky aktivitet është pjesë e Planit të Performancës së Departamentit të Ekologjisë Humane, Planit të Veprimit për Sëmundjet Kronike Jo-ngjitëse 2023–2025 dhe Strategjisë Sektoriale të Shëndetësisë 2025–2030, i cili ndikon në ngritjen profesionale për monitorimin e parametrave kimikë edhe në mjediset e brendshme.
Trajnimi përfshiu pjesë teorike dhe praktike për vendosjen e drejtë të aparaturave, matjet dhe mundësitë e evitimit të gabimeve gjatë monitorimit, si dhe analiza krahasimore me standardet e Organizatës Botërore të Shëndetësisë (OBSH), Bashkimit Evropian (BE) dhe Agjencisë për Mbrojtjen e Mjedisit (EPA) në SHBA.
Ligjëratat u mbajtën nga Prof. Dr. Antigona Ukëhaxhaj, ndërsa pjesa praktike u udhëhoq nga Xheladin Mjeku dhe Suzana Zylfijaj.
Trajnimi është zhvilluar me profesionistët shëndetësorë përkatës nga QRSHP Prishtinë dhe QRSHP Gjilan, si dhe ekipin e Laboratorit të parametrave mjedisorë, laborator ky i akredituar sipas standardit ISO 17025.