Në Prishtinë ka nisur punëtoria për Zhvillimin e Planit të Gjitha Rreziqeve për Komunikimin e Rrezikut, Angazhimin e Komunitetit dhe Menaxhimin Infodemik (RCCE-IM). Kjo punëtori organizohet nga Instituti Kombëtar i Shëndetësisë Publike të Kosovës (IKShPK), në bashkëpunim me Ministrinë e Shëndetësisë dhe Zyrën e OBSH-së në Prishtinë.
Gjatë hapjes së punëtorisë, drejtoresha ekzekutive e IKShPK-së, Dr. Ardita Baraku, falënderoi të pranishmit për pjesëmarrjen e tyre dhe theksoi rëndësinë e bashkëpunimit dhe koordinimit në përballjen me sfidat e shëndetit publik. Ajo rikujtoi përvojat e mëparshme, si pandemia COVID-19, duke theksuar rëndësinë e ndërtimit të një plani të qëndrueshëm për të parandaluar, reaguar dhe rikuperuar në situata me ndikim në shëndetin publik. “Thelbi i kësaj që po diskutojmë është që në raste emergjente të shëndetit publik, të shmangim duplikimin e aktiviteteve, të kursejmë resurset dhe të veprojmë të koordinuar.
Komunikimi efektiv është çelësi për përçimin e informatave të sakta dhe për nxitjen e veprimeve të duhura që ndihmojnë në kontrollin dhe parandalimin e rreziqeve,” u shpreh Dr. Baraku, duke uruar pjesëmarrësve punë të mbarë. Punëtoria, e cila do të zgjasë nga 10 deri më 12 dhjetor 2024, do të përfundojë me ndarjen e certifikatave nga OBSH për pjesëmarrësit dhe kontributin e tyre në këtë proces të rëndësishëm.