Më 20 mars 2025, në Institutin Kombëtar të Shëndetësisë Publike të Kosovës, nën udhëheqjen e Dr. Arsim Kurtit, udhëheqës i Laboratorit Referent për Rezistencë Antimikrobike, u mbajt një trajnim online me përfaqësuesit e rrjetit CAESAR të OBSH-së (Rrjeti i Mbikëqyrjes së Rezistencës Antimikrobike në Azinë Qendrore dhe Evropën Lindore).
Ky rrjet përfshin të gjitha vendet në rajonin Evropian të OBSH-së, të cilat nuk janë pjesë e Rrjetit Evropian të Mbikëqyrjes së Rezistencës Antimikrobike (EARS-Net), i cili koordinohet nga Qendra Evropiane për Parandalimin dhe Kontrollin e Sëmundjeve (ECDC).
Në trajnim mori pjesë edhe një ekspert nga EUCAST (Komiteti Evropian për Testimin e Ndjeshmërisë Antimikrobike) dhe fascilitator vendor Dr. Arsim Kurti.
Trajnimi kishte për qëllim forcimin e kapaciteteve në mbikëqyrjen dhe raportimin e rezistencës antimikrobike dhe ishte i fokusuar në:
· Metodologjinë e mbikëqyrjes sipas CAESAR-it
· Përdorimin e manualit dhe platformës elektronike të CAESAR-it
· Vlerat kufitare të EUCAST për përcaktimin e ndjeshmërisë bakteriale ndaj antibiotikëve
· Demonstrimin praktik të plotësimit të formave elektronike për raportimin e të dhënave.
Në këtë trajnim morën pjesë mikrobiologët nga IKSHPK dhe Qendrat Rajonale të Shëndetit Publik, të cilët patën mundësinë të përmirësojnë njohuritë e tyre dhe të shkëmbejnë përvoja me ekspertë eminentë ndërkombëtarë.
Ky aktivitet është një hap i rëndësishëm në forcimin e mbikëqyrjes së rezistencës antimikrobike në Kosovë, duke rritur përputhshmërinë me standardet ndërkombëtare, për testimin dhe raportimin e ndjeshmërisë së mikroorganizmave ndaj antimikrobikëve.