Dita Botërore e Ushqimit shënohet çdo vit më 16 tetor, me moton për vitin 2025: “Dorë më Dorë për ushqime më të mira dhe një të ardhme më të mirë”, dhe i kushtohet rritjes së ndërgjegjësimit për rëndësinë e sigurisë ushqimore dhe ushqyerjes së shëndetshme, si bazë për mbrojtjen e shëndetit publik.
Kjo ditë shërben për të kujtuar sfidat e vazhdueshme për qasje në ushqim të sigurt, të mjaftueshëm dhe cilësor. 
Pavarësisht përparimeve globale në prodhimin e ushqimit, miliona njerëz ende përballen me uri dhe kequshqyerje, duke theksuar nevojën për politika efektive, sisteme ushqimore fleksibile dhe bashkëpunim ndërsektorial për një sistem ushqimor të qëndrueshëm.
Instituti Kombëtar i Shëndetësisë Publike të Kosovës, përmes Departamentit të Ekologjisë Humane, rikujton se ushqimi i sigurt fillon në shtëpi — me higjienë të mirë, ruajtje të duhur të ushqimit dhe zgjedhje të kujdesshme të ushqimit.
Kujdesuni për mënyrën e përgatitjes dhe ruajtjes së ushqimit!
Zgjidhni produkte të freskëta, të sigurta dhe vendore kur është e mundur.
Ushqimi i sigurt është themel i shëndetit dhe mirëqenies për një jetë më cilësore.