Sot u mbajt “Forumi i Imunizimit”, një aktivitet i rëndësishëm i dedikuar prezantimit e arritjeve të fundit të Programit të Imunizimit në vend, adresimit të sfidave aktuale, si dhe shkëmbimit të përvojave shkencore dhe praktikave të mira me ekspertë kombëtarë dhe ndërkombëtarë.
Në këtë forum morën pjesë: përfaqësues nga Qendrat Rajonale të Shëndetit Publik, përfaqësues nga Kujdesi Parësor Shëndetësor (KPSH), arsimtarë, profesionistë shëndetësorë, përfaqësues institucionalë dhe partnerë ndërkombëtarë.
Forumi pati për qëllim krijimin e një platforme bashkëpunimi dhe dialogu ndërmjet institucioneve shëndetësore, partnerëve ndërkombëtarë dhe profesionistëve të fushës, me synim përmirësimin e mbulueshmërisë me vaksinim dhe forcimin e mëtejshëm të shëndetit publik në Kosovë.
Në hapje të aktivitetit morën fjalën:
* Ministri në detyrë i Shëndetësisë, Dr. Arben Vitia
* Ministrja në detyrë e Arsimit, Shkencës dhe Teknologjisë, znj. Arbërie Nagavci
* Drejtoresha Ekzekutive e IKSHPK-së, Dr. Ardita Baraku
* Përfaqësuesja e OBSh-së në Kosovë, Dr. Isme Humolli
* Përfaqësuesi nga Gavi, Jan Castillo FRANCA
* Përfaqësuesja nga UNICEF, Veronica Vashchenko.
Pas sesionit hyrës, pjesëmarrësit ndoqën një varg prezantimesh profesionale nga zyrtarë të IKSHPK-së, si dhe nga ekspertë vendorë e ndërkombëtarë, me tema që lidhen drejtpërdrejt me imunizimin dhe sfidat e imunizimit në shëndetin publik.